💻 જવું છે.. પરિચય થી કોડિંગ સુધી.. 💻

💻 જવું છે.. પરિચય થી કોડિંગ સુધી.. 💻

જૂની કમ્પ્યુટર લેબ પરત કર્યા પછી લગભગ બે વર્ષના સમયગાળા પછી નવી કમ્પ્યુટર લેબ ઇન્સ્ટોલ થઈ ગઈ!  કોરોના સમયમાં પણ કમ્પ્યુટર પર પોતાનો હાથ અજમાવવાનો બધાં બાળકોને મોકો નહોતો મળ્યો એટલે એવું લાગતું હતું કે ફરીથી વિદ્યાર્થીઓને કમ્પ્યુટર ફ્રેન્ડલી બનાવવા થોડા મુશ્કેલ બનશે ! પરંતુ ઇન્ટરેક્ટિવ ફ્લેટ પેનલ વખતે શાળાએ તૈયાર કરેલું તાલીમનું માળખું અમને આ કમ્પ્યુટર લેબમાં પણ ખૂબ જ કામ લાગ્યું.

 પહેલાં તો કમ્પ્યુટરની ગોઠવણી ફરીથી એવી રીતે કરી કે જેથી બાળકોને બેસવામાં, પોતાની જગ્યાએથી હલનચલન કરવામાં મુશ્કેલી ન પડે. આ કમ્પ્યુટર લેબ સાથે કમ્પ્યુટરદીઠ આવેલી બે મોટી ખુરશીઓને બદલે એક નાની ખુરશી અને એક આ મોટી ખુરશી એવી રીતે બેઠક વ્યવસ્થા કરવાથી તેઓ સરળતાથી કોમ્પ્યુટર સામે ગોઠવાઈ શક્યા.

બાળકોને ધ્યાનમાં રાખીને તેમને કમ્પ્યુટર વડે શું શું શીખવવું જોઈએ તેવી એક કાચી યાદી તૈયાર કરી અને તેને વ્યવસ્થિત રીતે એક અભ્યાસક્રમના માળખામાં ગોઠવી. તે અભ્યાસક્રમમાંથી અન્ય વિષયોમાં જે અધ્યયન નિષ્પતિઓ છે તે પ્રકારે કમ્પ્યુટરની અધ્યયન નિષ્પત્તિઓ તૈયાર કરી.

 નાગરિક ગણતર હેઠળ થયેલા 4 જૂથ વાયુ,અગ્નિ, પૃથ્વી અને જળ મુજબ તેમને આ અધ્યયન નિષ્પત્તિઓની પ્રિન્ટ આપવામાં આવી. તેની સાથે જ તેમને કમ્પ્યુટર લેબના કમ્પ્યુટર્સ પણ જૂથ મુજબ વહેંચ્યા. પ્રથમ દિવસે ગ્રુપના લીડર- ઉપલીડર તેમજ દરેક ધોરણના દરેક જૂથમાંથી બે બે વિદ્યાર્થીઓને કમ્પ્યુટર લેબમાં એક પરિચય કરાવ્યો.  અને હવે આ આખી પ્રક્રિયા ઑટો મૉડમાં થઈ ગઈ છે!  હવે તેઓ જ વારાફરતી પોતાના જૂથના સભ્યોને કમ્પ્યુટર લેબમાં લાવી અને પહેલા ક્ષેત્રની અધ્યયન નિષ્પતિઓ મુજબની પ્રેક્ટિસ કરાવી રહ્યા છે.

જોઈએ આ કમ્પ્યુટર પરિચયથી કોડિંગ સુધી લઈ જવા ધારેલી અમારી આ યાત્રા કેવી રહેશે ! હા, આ દરમિયાન અમને સમજાયું કે બાળકોને માઉસ અને કીબોર્ડના ઇફેક્ટિવ ઉપયોગ માટે કેટલીક ગેમ્સની જરૂર પડશે ઇન્ટરનેટ પર તો ઢગલો ગેમ્સ છે.  શું આવી કોઈ ગેમ તમારા ધ્યાનમાં છે જે બાળકોને સરળતાથી કીબોર્ડ અને માઉસનો ઉપયોગ શીખવી શકે ?

VIDEO