💥💥દીપાવલી બની દિલવાલી ! 💥💥

💥💥દીપાવલી બની દિલવાલી ! 💥💥

તમે બેઠા હો, ઘરે નાના કોડિયામાંથી ફેલાતા અજવાળાને જોતા, અને ત્યાં જ તમને તમારું આખું કર્મ ઝળહળતું જોવા મળે તો આંખોમાં વર્ષો સુધી જોયેલી “રાહ” હવે એક નવી રાહ ચીંધતી દેખાય !

શાળાની પ્રથા રહી છે કે ગામમાં ઉજવાતા વિવિધ તહેવારોને શાળામાં ઉજવવા અને તે કેમ ઉજવાય તેની પાછળના કારણોની ચર્ચા કરવી. શાળામાં ઉજવાતા થયા પછી ગામમાં એ તહેવારો ઉજવવાની રીતભાત પણ બદલાઈ હોય એવા ય ઉદાહરણો છે. પોતાના બાળકોનો જન્મ એમના માટે નગણ્ય હતો, ત્યારે અમે શાળામાં તેમના જન્મદિવસ ઉજવવાનું શરૂ કર્યું. તો હવે તેઓ અમારા (શિક્ષકોના) જન્મદિવસ ને ય ભવ્ય રીતે ઉજવે છે. જે વાલીથી જે શક્ય બને તેવી મીઠાઈ વડે અમારું મો મીઠું કરાવે છે. અરે ! જેની સાથે ખાસ લેવા દેવા નથી એવા વ્યક્તિઓ પણ પરસ્પર એકબીજાને જન્મ દિવસે “હેપ્પી બર્થ ડે” વિશ કરે છે ! અમારા “આપણું નવા નદીસર” વોટ્સેપ ગ્રુપમાં નાના બાળકો ની સાથે મોટેરાઓના જન્મ ને ય ખુશીથી વધાવી લેવાય છે.

     આ દિવાળી વિકેશન ટૂંકું હતું અને અમારી ઘરના કામમાં વ્યસ્તતા પણ વધુ હતી એટલે શાળાના પ્રાંગણ સુધી જવાનું નહીવત બન્યું, પરતું ગામ આખું શાળા બાગની દેખરેખ રાખતું હોય ત્યારે હવે એ વિષે વધુ ચિંતા રહેતી નથી. પણ આ શાળા અમારા સુધી ગામના યુવાનો વડે રોજ પહોચતી જ રહી.  ખુશીથી નાચવાનું મન ટતો ત્યારે થયું જયારે તેમના તરફથી આ દિવાળીએ ગીફ્ટ આપવાની શરૂ થઇ. વાઘ બારસે સરસ્વતીના મંદિરમાં એક કોડિયું પ્રગટાવ્યું એ ય અમારા દિલને અડકી ગયું... પણ આંખોમાં હજુ ય ઝગમગે છે અમાસની એ રાતને અજવાળી કરી દેનારું દ્રશ્ય !

ગામે નક્કી કર્યું કે આ વખતે આખા ગામમાં કોડિયા મુકાય અને ત્યાં અજવાળું હોય તો શાળાની ઈમારતમાં અંધારું ના ચાલે ! હવે તહેવારનો મિજાજ હોય અને આવું નક્કી થાય એટલે એમણે નાનો નાનો ફાળો કર્યો અને ખરીધ્યા મીણબત્તીના પેકેટ... રાત્રે બધા બાળકો, યુવાનો શાળામાં આવી ત્રીજા માળથી લઇ બધા વર્ગખંડ આગળ અને છેક છતની કિનારી કિનારીએ અજવાળા પ્રગટાવ્યા ! અહિયાં, આનંદ એક શાળાને ઝળહળતી જોવાનો નહિ પણ એ ઉજાસ કરવા મથનાર હાથોમાંથી નીતરતા તેજને જોવાનો હતો.

આ દિવાળીએ અમને આ નવું તેજ આપ્યું છે અને તે જ તેજ લઇ અમે ઉપડ્યા છીએ નવા સત્રની સફરે !