Masti Ki Pathashala @NavaNadisar: January 2018

સિક્રેટ સુપર સ્ટાર !

પ્રજાસત્તાક દિન ઉજવવાથી દેશના લોકતંત્ર વિષે જાગૃતતા આવે. દેશના લોકોને એ અહેસાસ થાય કે અમે કેટલા અગત્યના છીએ ! અમે જ છીએ કે જેઓ દેશ બનાવી રહ્યા છીએ. શાળાએ આ વખતના પ્રજાસત્તાક દિને – ગામને એ સમજાવવાનો મોકો લીધો કે તેઓ કેટલા અગત્યના છે !

દરેક વખતની જેમ “ના ના ના કહેતા ગયા અને બાળકોએ ૨૨ જેટલા કાર્યક્રમો ગોઠવી દીધા.” કાપીએ તો કોનો કાર્યક્રમ કાપીએ ? આખરે આ મોકો હોય છે કેટલાક બાળકો માટે “હીરો” થવાનો ! રોજ રોજ ભણવામાં બાથોડા ભરતા બાળકો આવા કામમાં બીજાને બાથે પડી જાય છે ! કાર્યક્રમ તો આપ અહીં જોઈ શકશો ! પણ જેનું વિઝ્યુઅલ અમારી પાસે નથી તે વાત વહેચવી ગમે એવી છે !

પહેલું તો અમારા તરફથી હાથ ઊંચા કરી દેવાયા કે આ વખત સિલેકશન તમારું – પ્રેક્ટિસ તમારી – અમે પ્રેક્ષક અને તમે કહેશો તે મદદ ! કેટલાક અમે ધારેલા કાર્યક્રમો તો આવી જ જવાના હતા – પણ નવું ઉમેરાયું “સ્વાગ સે કરેંગે સબ કા સ્વાગત !” કોરિયોગ્રાફર – YouTube ! મજેદાર એ કે ક્યારેય આવા ડાન્સ પ્રકારમાં ના જોવા મળે એવી રીટા ફ્રન્ટ લાઈનમાં હતી અને એને જોઇને એવું લાગે નહિ આ પ્રકારનો તેનો પ્રથમ પ્રયાસ છે ! નાના ટાબરિયાના દશકા દસ અને ચાલો જોવા જઈએ મેળો – યજ્ઞનો ઘોડો અને સામે મૂરખના સરદાર ! તો હિન્દી નાટિકા સચ્ચા બાલક ! ઇન્ડીયા વાલે અને ઐસા દેશ હૈ મેરાની રીધમ (ફરી કોરિયોગ્રાફર YouTube !) સિંગિંગ સેન્સેશનલ નેહલનું “સોને કા ભારત મેરા...” અને બીજા કાવ્ય ગાન પણ ખરા ! અમરદીપનો સિપાહી તરીકેની એકોક્તિ !

માઈમમાં ઉમેરાયેલો સાઉન્ડ અને તેના વડે “હમ સબ એક હૈ” ની સળગતી ચિનગારી ! એક ગ્રુપ માટે બહુ તાળીઓ પડી એ બધા અમારા સિક્રેટ સુપર સ્ટાર્સ – સામાન્ય રીતે વર્ગમાં ચુપચાપ થઇ જતા સૌએ મળીને ચોર્યું “ગામડાનું દિલ” ! એમાંય સુનીલની ચણીયા ચોળી પહેરી બિન્દાસ ઘૂમરી ખાવી !

સૌથી મોટું આશ્ચર્ય ગામમાંથી મોટી સંખ્યામાં આવેલા ગ્રામજનો અને તેમનો ઉત્સાહ ! અમે ય વચ્ચે વચ્ચે મોકા લીધા “ગૃહકાર્ય કેમ જરૂરી છે ?” “ શાળાનું પર્યાવરણ સર્જવામાં તેમનો ફાળો કેવી રીતે છે ?” “ એસ.સી.ઈ. અંતર્ગત હવે કેવી રીતે તેમના બાળકોનું મુલ્યાંકન થાય છે ?” જેવા મુદ્દાઓની ચર્ચા થઇ ! પ્રયાસ થયો કે તેઓ શાળાની સિદ્ધિઓ અને સમસ્યાઓ બંનેથી વાકેફ રહે ! આખરે ઉદેશ્ય એ જ કે જે એમનું છે એના વિષે તેઓ જાગૃત થાય !

ખેર, વર્ષોવર્ષ થતા જુદા જુદા પ્રયાસોથી રચાયેલું આ ઉત્સાહ પર્વ અહી જોઈએ – અને આવા કાર્યક્રમમાં બીજું શું જોડવું ? એવા સવાલ સાથે – “વંદે માતરમ !”

નીચે ક્લિક કરો અને વિડીયો જુઓ !!

પતંગનો પાંચમો ખૂણો !

શીખવા જેવી મજેદાર ક્રિયાને આપણે સૌએ એવી તો કંટાળાજનક બનાવી દીધી છે કે બાળક સામે જ્યાં ભણવાનું નામ પડે ત્યાં ભડકે ! દરેક સજીવ દરેક ક્ષણે કૈક શીખે જ છે. જેમ આપણે શ્વાસ વગર ના રહી શકીએ શકીએ એમ શીખ્યા વગર પણ ના રહી શકીએ ! આવી રસપ્રદ ઘટના અને આપણે સૌએ ઘટમાળમાં ભેળવીને તદ્દન નીરસ અને શીખનાર માટે નિરર્થક બનાવી દીધી છે ! અને જ્યારે શીખવું બોજારૂપ લાગતું હોય ત્યારે શીખવવાનું કામ થઈ શકતું નથી.

ઉત્તરાયણ જેવો ધમાકેદાર તહેવાર પછી છે શાળામાં આવવું એ બાળકોને માટે કોઈ મોટી સજા હોય તેવું લાગે છે પરંતુ જો શાળાને જ પતંગમય બનાવી દઈએ તો ? દરેક વખતની જેમ આ વખતે પતંગ મહોત્સવમાં શું નવું કર્યું તેના વિશેની ચર્ચાને અંતે કેટલીક બાબતો નક્કી થઇ.

Ø પતંગનો ઈતિહાસ
Ø પતંગનું વિજ્ઞાન – પતંગ કેવી રીતે ઉડે છે ?
Ø પતંગ અને વિમાન વચ્ચે શું સામ્ય છે ?
Ø ઉત્તરાયણ એટલે શું ?
Ø મકરસક્રાંતિ એટલે શું ?
Ø પતંગ કેવી રીતે બનાવાય છે ?
Ø પતંગ બનાવવમાં કઈ કાળજી લેવી જોઈએ ?

જેવા મુદ્દાઓ પર ચર્ચા થઇ.

ગામમાંથી વીણી લાવેલી ચિપ્સનો ઉપયોગ કરી બધાએ ગ્રુપમાં જુદી જુદી પતંગો બનાવી ગ્રીન હોલમાં લગાવી. આજે મધ્યાહન ભોજન પણ ઉત્તરાયણ સ્પેશીયલ “ઊંધિયું, પૂરી અને જલેબી” ખાતા ખાતા સ્પીકર પર ઉત્તરાયણના ગીત વાગે વચ્ચે વચ્ચે આજે આપણે ઊંધિયું ખાધું તેમાં કઈ કઈ શાકભાજી છે તેની યાદી બોલવામાં આવી. અને પછી અમારું મેદાન – અમારું આકાશ – અમારી દોરી – અમારી પતંગ અને અમારી બુમો પણ ખરી જ !

દિવસના અંતે સૌ ફરી ભેગા મળી આજે શું ગમ્યું, શું ના ગમ્યું ની ચર્ચા અને હોમ વર્ક ? એ જ ઉત્તરાયણ સ્પેશીયલ !

આજ નો દિવસ લખો – ઊંધિયું બનાવવા કઈ કઈ સામગ્રી જોઈએ અને તે કેવી રીતે બને તે લખો ! દિવસને અમે ચકાસ્યો ત્યારે સમજાયું કે પતંગ ચગાવવા અને ઊંધિયું ખાવામાં શાળામાં સંખ્યા એ જ દિવસે પૂર્ણ થઇ ગઈ અને એ રીતે હાજરીમાં અમને પોસ્ટ ઉત્તરાયણ ઈફેક્ટ ના વરતાઈ .. વિજ્ઞાન, ઈતિહાસની જાણકારી મેળવી અને પતંગ બનવા માટેનું કૌશલ્ય પણ તેઓ એ કેળવ્યું એ તો અમારો નફો અને એ જ અમારો પતંગનો પાંચમો ખૂણો !